பிரிவுகள்
பயணம்

ஒரு பயணத்தின் படக்கதை – தெற்காக டாரி வரை

பயணத் திகதி: நவம்பர் 22, 2010

கிறாப்டனில் இருந்து தெற்காக 80கிமீ பயணித்து நாம் கொப்ஸ் துறைமுகத்தை அடையும் போது பிற்பகல் 3 மணி ஆகியிருந்தது. மேகம் சூழ்ந்து மழை தூற ஆரப்பித்ததால் அங்கு சில படங்களை எடுத்து, சிறிது நேரம் உலாவிய பின்னர் பயணத்தை தொடர்ந்தோம்.

ஒரு பயணத்தின் படக்கதை - தெற்காக டாரி வரை

கொப்ஸ் துறைமுகம் (Coffs Harbour) நியூ சவுத் வேல்ஸ் மாநிலத்தின் வடக்கு கரையோரத்தில் அமைந்துள்ள ஒரு முக்கிய சுற்றுலா நகரம். மலைகளாலும், தேசிய வனங்களாலும், அழகிய கடற்கரைகளாலும் சூழப்பட்டிருப்பதால் பெருநகரங்களிலிருந்து பலரையும் கவரும் ஒரு ஊராக இது திகழ்கிறது. சுற்றுலாத் துறையைத் தவிர வாழைப் பயிர்ச்செய்கையும் இங்கு ஒரு முக்கிய தொழிற்துறையாக இருக்கிறது.

கொப்ஸ் துறைமுகம் (Coffs Harbour)
கொப்ஸ் துறைமுகம் சிறுபடகுகளுக்கு பிரபலமான ஒரு துறைமுகம். இங்கு வரும் சுற்றுலாப்பயணிகளில் கணிசமானவர்கள் கடல் மாரக்கமாக பயணம் செய்து வருகிறார்கள்.
கொப்ஸ் துறைமுகத்தில் ஒரு படகு
கொப்ஸ் துறைமுகத்தில் ஒரு படகு. இங்கு நிறுத்தப்பட்டுள்ள படகுகளில் பெரும்பாலானவை விடுமுறைக்காலங்களில் மட்டுமே பயன்படுத்தப்படுபவை.
Coffs Harbour Customs
கொப்ஸ் துறைமுகத்திலுள்ள சுங்க அலுவலகம். கடல்வழியாக கொண்டுவரக்கூடிய தாவர உயிரிகள், மற்றும் போதைப்பொருட்களை கட்டுப்படுத்துவது இவர்களின் முக்கிய பணியாகக் குறிப்பிடப்படுகிறது.

நாம் மேலும் 50கிமீ தெற்காக பயணித்து மாலை 4 மணியளவில் Nambucca Headsஐ அடைந்தோம். நம்புகா நதியின் முகத்துவாரத்துக்கு அண்மையில் அமைந்த இந்நகரம் அலைச்சறுக்கு விருப்பிகளுக்கு பிரபலமானது. நாம் வந்த நேரத்தில் ஊர் மூடத்தொடங்கியதால் Captain Cook Lookout பகுதியில் சில படங்களை கிளிக்கிய பின்னர் எமது பயணம் தொடர்ந்தது.

Nambucca Heads Estuary
நம்புக்கா நதி கடலுடன் சங்கமிக்கும் Nambucca Heads முகத்துவாரம்.
Captain Cook Lookout
நாம் பயணித்த வாடகை வண்டி Captain Cook Lookout குன்றின் உச்சியில்.

இன்னுமொரு 110கிமீ பயணம், பசிபிக் நெடுஞ்சாலையில் மணிக்கு 110கிமீ வேகத்தில் நாம் Port Maquarieஐ அடைந்த போது நேரம் மாலை 7.30. கோடை காலம் என்பதால் இன்னமும் வெளிச்சம் இருந்தது. பசி எம்மை அழைத்ததால் அங்கிருந்த ஒரு தாய் உணவகத்தில் இரவுக்கு பசியாறினோம்.

பொர்ட் மகுவாறி (Port Maquarie) நியூ சவுத் வேல்ஸ் மாநிலத்தின் வடக்கு கரையோரத்தில் அமைந்துள்ள ஒரு பெரு நகரம். இது ஓய்வுபெற்றவர்கள் விரும்பி குடியேறும் ஒரு பிரதேசமாக குறிப்பிடப்படுகிறிது. 1879ல் அமைக்கப்பட்ட டக்கிங் பொயின்ட் கலங்கரை விளக்கம் (Tacking Point Lighthouse) இங்குள்ள ஒரு முக்கிய இடமாகும். அவுஸ்திரேலியாவின் மூன்றாவது பழைய கலங்கரை விளக்கம் என்று எமது கையேடு சொல்லியதால் அங்கு செல்வது என முடிவெடுத்து GPS இடம் சொன்னால் அது எம்மை அரைமணித்தியாலங்களுக்கு சுத்தலில் விட்டுவிட்டது.

The day sets down
மாலை மங்கும் நேரத்தில் டாரி நோக்கி பசிபிக் நெடுஞ்சாலையில்...

இரவு 8மணிக்குப் பின்னர் வானம் மிகவும் இருட்டிவிட்டதால் அங்கிருந்து  பயணத்தை தொடர முடிவுசெய்தோம். தெற்காக பசிபிக் நெடுஞ்சாலையில் முடிந்தவரை செல்லலாம் என்று 80கிமீ பயணித்து 9மணியளவில் டாரி என்னும் ஊரை அடைந்தோம். களைப்பும் தூக்கமும் நெடுச்சாலைப் பயணத்தின் எதிரிகள் எப்பதால் அந்த ஊரிலேயே இரவு தங்கினோம். இரண்டாம் நாளின் முடிவில் பயணித்த மொத்த தூரம் 802கிமீ, இரண்டாம் நாள் பயணித்த தூரம் 505கிமீ.

அடுத்த பதிவில் மூன்றாம் நாள்…

பிரிவுகள்
பயணம்

ஒரு பயணத்தின் படக்கதை – கிறாப்டன்

பயணத் திகதி: நவம்பர் 22, 2010

கிறாப்டன் கிளரன்ஸ் ஆற்றுப் பள்ளத்தாக்கில் அமைந்துள்ள ஒரு முக்கிய நகரம். 1855ம் வருடம் அமைக்கப்பட்ட இந்நகரம் இந்த பிரந்தியத்தின் ஆரம்ப குடியேற்றங்களாலும் இன்றும் இருக்கும் பல பழைய கட்டடங்களாலும் முக்கியத்துவம் பெறுகிறது. இந்த பிரந்தியத்தின் பிரதான விமான நிலையமும் கிறாப்டனிலேயே அமைந்துள்ளது.

ஒரு பயணத்தின் படக்கதை - கிறாப்டன்

யாம்பாவிலிருத்து பசிபிக் நெடுஞ்சாலையில் 60கிமீ தெற்காக பயணித்து கிறாப்டன் நகரை அடையும் போது நேரம் பகல் 12மணி. இங்கு பார்கக்கூடய இடங்களைப் பற்றி அறிவதற்கு பயணிகள் தகவல் மையத்திற்கு சென்றால், திங்கட்கிழமைகளில் பெரும்பாலான இடங்கள் இங்கு மூடி இருப்பதாக சொன்னார்கள். பகல் உணவை Hungry Jacksல் முடித்த பின்னர், பழைய நகரை சுற்றி ஒரு நகர்வலம் வந்து சில புகைப்படங்களையும் எடுத்துக்கொண்டோம். அங்கிருந்து கொப்ஸ் துறைமுகம் நோக்கி எமது பயணம் தொடர்ந்தது.

Retired
ஒரு பழைய நகரின் பழைய எரிபொருள் நிரப்பு நிலையம்.
Prince Street, Grafton
கிறாப்டன் கடைவீதி.
Grafton Clock Tower
கிறாப்டனின் மத்தியில் அமைந்துள்ள இந்த மணிக்கூட்டு கோபுரம் 1800களில் கட்டப்பட்டது.
Christ Church Cathedral, Grafton
1884ம் வருடம் கட்டப்பட்ட Christ Church Cathedral இந்த பிராந்தியத்தில் உள்ள பழமையான தேவாலயங்களில் ஒன்றாகும்.

அடுத்த பதிவில் கொப்ஸ் துறைமுகத்திலிருந்து டாரி வரை பயணிக்கலாம்…

பிரிவுகள்
பயணம்

ஒரு பயணத்தின் படக்கதை – யாம்பா

பயணத் திகதி: நவம்பர் 22, 2010

இரண்டாவது நாள் காலை 8 மணிக்கு விடிந்தது. பாணும் மீனும் தேநீரும் காலை உணவாகியது. பலீனாவில் பார்ப்பதற்கு எதுவும் இல்லாததால் அங்கிருத்த கோல்ஸ் அங்காடியில் மேலும் சில பொருட்களை வாங்கிய பின்னர் யாம்பா நோக்கி பயணித்தோம்.

ஒரு பயணத்தின் படக்கதை - யாம்பா

யாம்பா, பலீனாவிலிருது தெற்காக உள்ள ஒரு சிறு துறைமுக நகரம். பசிபிக் நெடுஞ்சாலையில் தெற்காக 80கிமீ பயணித்து, யாம்பா றோட் வழியாக கிழக்காக 15 கிமீ பயணித்தால் யாம்பா நகரை அடையலாம். இங்கிருக்கும் கலங்கரை விளக்கும் கடற்கரையும் பிரபல சுற்றுலா தலங்கள் என்று ஒரு வழிகாட்டி கையேடு சொன்னதால் இங்கு செல்ல முடிவெடுத்திருந்தோம். நாம் யாம்பாவை சென்றடையும் போது காலை 11மணி ஆகியிருந்தது. புகைப்படங்கள் எடுக்கவும் இளைப்பாறவும் சிறிது நேரம் அங்கு நிறுத்திய பின்னர் கிறாப்டன் நோக்கிய எமது பயணம் தொடர்ந்தது.

Pacific Highway
பசிபிக் நெடுஞ்சாலை வழியே பயணம்.
Chatsworth Island, New South Wales
பசிபிக் நெடுஞ்சாலையில் பலீனாவுக்கும் யாம்பாவுக்கும் இடையே ஆறுகளால் சூழப்பட்ட ஒரு பசுமையான பிரதேசம் சட்ஸ்வேர்த் தீவு.
Yamba Road
யாம்பா செல்லும் இந்த பாதை விவசாய நிலங்களும் பின்னர் சதுப்பு நிலங்களாலும் சூழப்பட்டுள்ளது.
The Clarence River Lighthouse at Yamba
Clarence River Light யாம்பாவில் அமைந்துள்ள ஒரு கலங்கரை விளக்கம். இங்குள்ள கலங்கரை விளக்கம் 1880ல் முதலில் கட்டப்பட்டுள்ளது. தற்போதுள்ள அமைப்பு 1955ல் நவீனமயப்படுத்தப்பட்டு கட்டப்பட்டுள்ளது.
Yamba Beach
அமைதியான நடுவெய்யில் நேரத்தில் யாம்பா கடற்கரை.

அடுத்த பதிவில் கிறாப்டன்…

பிரிவுகள்
பயணம்

ஒரு பயணத்தின் படக்கதை – நிம்பின்

பயணத் திகதி: நவம்பர் 21, 2010

எமது பயணத்தின் முதல் நாளில் நாம் சென்ற முக்கியமான ஊர் நிம்பின். இது நியூ சவுத் வேல்ஸ் மாநிலத்தில், பிரபலமான பைரன் குடாவிலிருந்து 70 கிமீ மேற்காக அமைந்துள்ளது. நிம்பின் தொழிற்துறை ரீதியாக பின்தங்கிய ஒரு பிரதேசத்தில் இருந்தாலும், வெளிநாட்டு சுற்றுலா பயணிகளை அதிகம் கவர்ந்த ஒரு கிராமமாக திகழ்கிறது. இது அவுஸ்திரேலிய Bundjalung பழங்குடி மக்களின் பூர்வீக இடமா கருதப்பட்டாலும், தற்காலத்தில் மாற்று கலாச்சாரங்களுக்கான ஒரு மையமாக உருவெடுத்துள்ளது.

ஒரு பயணத்தின் படக்கதை - நிம்பின்

நிம்பின் அவுஸ்திரேலியாவின் ‘கஞ்சா தலைநகரமாக’ கருதப்படுகிறது. இங்கு கஞ்சாவின் ‘நேரடி’ விற்பனை இல்லாவிட்டாலும், கஞ்சா கலாச்சாரம்/ஹிப்பி கலாச்சாரம் சார்ந்த ஏனைய பொருட்கள் இலகுவில் கிடைப்பது பலர் இந்த ஊரை நாடிவர முக்கிய காரணம் என குறிப்பிடப்படுகிறது. இங்கு வருடாந்தம் நடைபெறும் கஞ்சா மாநாட்டிற்கு அவுஸ்திரேலியாவிலிருந்து மட்டுமல்லாது பல வெளிநாடுகளிலிருந்தும் நூற்றுக்கணக்கானவர்கள் கலந்து கொள்வது இந்த ஊரின் பெருமையைச் சொல்கிறது.

Nimbin Village
நிம்பின் கடைவீதி. இங்கு ஒரு 10-15 நிமிடங்கள் நடந்து திரிந்தால் சொர்க்கத்தில் பறக்கும் சுகத்தை அனுபவிக்க நேரலாம்.
Nimbin H.E.M.P. Embassy
இந்த பிரதேசத்தில் கிடைக்கும் பல்வேறு போதைப்பொருள்/கஞ்சா சார்ந்த பொருட்கள் பற்றிய விபரங்களை இங்கு பெறலாம். 1973ல் நடைபெற்ற கஞ்சா மாநாட்டிலிருத்து இவர்களின் சேவை தொடர்கிறது.
Nimbin School Of Arts
1904ம் வருடம் திறக்கப்பட்ட நிம்பின் கலைப் பாடசாலை இந்த பிரதேசத்தின் முதலாவது பொதுக் கட்டடம். தற்போது இது ஒரு ஊர் மண்டபமாக பயன்படுகிறது.
Nimbin Visitor Information Centre
நிம்பின் விருந்தினர் தகவல் மையம். இங்கு சுற்றுலா பயணிகளுக்கு இந்த பிரதேசத்தை பற்றிய பொதுவான தகவல்களை வழங்கப்படும். இந்த ஊரில் புத்தர் கடும் பிரபலம், காரணம் தான் தெரியவில்லை.
Nimbin Environment Center
நிம்பின் சூழல் மையம், இந்த பிரதேசத்தின் சூழலை பாதுகாப்பதற்காக அமைக்கப்பட்ட ஒரு சமூக நிறுவனம்.
Nimbin Business Hours
ஒரு பானை சோற்றுக்கு ஒரு சோறு பதம். ஒரு கடை வாசலில் இருந்த திறந்திருக்கும் நேரங்கள் பட்டியல். இங்கு மக்கள் இருக்கும் 'நிலை' இதை வாசித்தால் புரியும்.
Nimbin Road
நிம்பினில் அதிக நேரம் தாமதித்தால் எங்களின் நிலை என்வாகும் என்பது தெரியாததால் நாம் மாலை மங்கும் நேரத்தில் அங்கிருந்து எமது பயணத்தை தொடர்ந்தோம்.

முதலாவது நாள் கிறாப்டன் நகருக்கு பயணிப்பதாக திட்டமிட்டிருந்தாலும், நிம்பின் நோக்கிய எமது பாதை விலகலால், இரவாகும் போது பைரன் குடாவிற்கு தெற்காக உள்ள பலீனா நகரில் தங்க முடிவெடுத்தோம். முதல் நாளில் 297கிமீ பயணம் செய்திருந்தோம். நாம் எடுத்துச் சென்றிருந்த பாணும் டூனாவும் எமது இரவு உணவாகியது.

அடுத்த பதிவில் யாம்பா…

பிரிவுகள்
பயணம்

ஒரு பயணத்தின் படக்கதை – முதல் நாள்

பயணத் திகதி: நவம்பர் 21, 2010

கடந்த வருடம் நவம்பர் மாதம் பிரிஸ்பேனிலிருந்து மெல்பேர்னுக்கு சென்ற road trip பற்றி ஒரு தொடர் பதிவு எழுதலாம் என்று நினைத்திருந்தேன். ஆனாலும் நேரமின்மையால் அது சாத்தியமாவது போல் தெரியவில்லை. ஏற்கனவே இரண்டு மாதங்கள் ஆகிவிட்டது. அந்த பயணத்தின் போது எடுத்த படங்களை ஒரு தொடராக இடுகிறேன். படங்களோடு ஆங்காங்கே எனது அனுபவங்களும் வரும்.

ஒரு பயணத்தின் படக்கதை

இது ஒரு குறுகிய காலத்தில் திட்டமிட்ட ஒரு நீண்ட பயணம். மூன்று மாநிலங்கள், பல நகரங்கள், பத்து நாட்கள் மற்றும் 3300 கிமீ நெடுஞ்சாலைப் பயணம் என்பதை ஒரு நீண்ட பயணம் என்று சொல்லலாம் தானே.  மெல்பேர்ணில் இருக்கும் நண்பன் அருணன் விடுமுறைக்காக நவம்பரில் பிரிஸ்பேன் வருவதாக முடிவாகிய பொது அவன் திரும்பிச் செல்கையில் காரில் செல்லலாமொ என்ற எண்ணம் தோன்றியது. எனக்கும் பல்கலைக்கழகத்தில் விடுமுறை சாத்தியம் என்பதால் இந்த பயணத்தை நவம்பர் முதல் வாரத்தில் திட்டமிட்டு கடைசி வாரத்தில் பயணம் சாத்தியமானது.

நவம்பர் 21, ஞாயிறு எமது பயணம் ஆரம்பமானது. காலை 10 மணிக்கு Hertzல் பதிவு செய்திருந்த Toyota Camry Altise வண்டியை எடுத்து, பாண் மற்றும் சில பொருட்களையும் வாங்கிய பின்னர், பசிபிக் நெடுஞ்சாலையில்  பயணம் ஆரம்பமானது. எமது முதலாவது நிறுத்தம் பிரிஸ்பேனுக்கு தெற்காக 100கிமீல் உள்ள டுவீட் ஹெட்ஸ் முனை.

Point Danger
Point Danger அவுஸ்திரேலியாவின் கிழக்கு கரையோரத்தில் தங்க கடற்கரை பிரதேசத்தில் அமைந்துள்ள ஒரு முனைப் பகுதி. இது அவுஸ்திரேலிய மாநிலங்களான குயின்ஸ்லாந்து மற்றும் நியூ சவுத் வேல்ஸ் ஆகியவற்றின் எல்லையாகவும் அமைகிறது.
Captain Cook Memorial Lighthouse
கப்டன் குக் நினைவு விளக்கு 1971ம் வருடம் கட்டப்பட்ட ஒரு கலங்கரை விளக்கம் ஆகும். இது குவின்ஸ்லாந்தின் குலங்கட்டாவுக்கும் நியூ சவுத் வேல்ஸின் டுவீட் ஹெட்ஸுக்கும் இடையிலான எல்லைக் கோட்டில் அமைந்துள்ளது.
Captain Cook Memorial Lighthouse
மண் நிறத்தில் இருப்பது குயின்ஸ்லாந்து, சாம்பல் நிறத்தில் இருப்பது நியூ சவுத் வேல்ஸ். இந்த மாநிலங்களின் எல்லை 1863ம் வருடம் முதல் இங்கு குறிக்கப்பட்டுள்ளது.
Old Lines
நிம்பின் கிராமத்தை நோக்கி பயணிக்கையில் எம்மோடு பயணித்த பாதை.
Nimbin Road
நிம்பின் கிராமத்தை நோக்கி நாம் பயணித்த பாதை, முழுதாக தார் பாதையாக இருந்தாலும் பல இடங்களில் மண் பாதை போலவும் இருந்தது, ஒரு கிராமத்துக்கே உரித்தான புழுதி வாசனையுடன்.
Mt Burrell Fruit
போகும் வழியிலே ஒரு பழக்கடையும், வாசலிலே குருவி விரட்டும் ஒரு வெருளியும்.

அடுத்த பதிவில் நிம்பின் கிராமத்தை பார்க்கலாம்…

பிரிவுகள்
பயணம்

துருக்கித் தொப்பி – ஒரு பயண அனுபவம்

இரண்டாவது முறையாக வெளிநாட்டு பயணம், இம்முறை இன்னும் இரண்டு நண்பர்களுடன். பயணத்தின் நோக்கம் பல்கலைக்கழக கருத்தரங்கொன்றில் இடம்பெற்ற போட்டி ஒன்றில் எமது இறுதி ஆண்டு செயற்திட்டம் (Project) பற்றிய ஒரு அறிமுக அளிக்கை (?) (Presentation) செய்வது. ஆனாலும் இதற்கு மேலதிகமாகவே இன்னும் பல இனிய அனுவங்களை இந்த பயணம் எமக்கு பெற்றுத்தந்தது. துருக்கியின் இஸ்தான்புல் நகரை நோக்கிய அந்த இனிய பயணத்தின் அனுபவங்கள் சில.

பயண ஏற்பாடுகள், புது தில்லியில் வீசா, presentation தயார்செய்தல் என பரபரப்பாக இருந்த ஒரு மாதத்தின் பின்னர், மே 8ம் திகதி கொழுப்பிலிருந்து எமது பயணம் ஆரம்பமாகியது. எமது விமானம் அதிகாலை 3 மணிக்கு என்பதால் இரவு 11 மணியளவில் நானும் ரமணனும் சயந்தனும் விமான நிலையத்தை நோக்கி பயணமானோம். உலகின் பாதுகாப்பான விமான நிலையங்களுள் ஒன்றாக கட்டுநாயக்க விமான நிலையம் இருப்பதால் அங்கிருந்த மூன்றடுக்கு பாதுகாப்பு, இரண்டு தடவை பயணபொதி சோதனை, ஒரு பஸ்பயணத்தை தாண்டி விமானநிலையத்துக்குள் நுழைய நள்ளிரவு 12 மணி ஆகியிருந்தது.

நான் முதலிலேயே ஒன்லைன் Check-in செய்திருந்த படியால் எமக்கு ‘தனி வரிசை’. எமது பயண பொதிகளை ஒப்படைத்து விட்டு கடவுச்சீட்டு கட்டுப்பாட்டு பகுதிக்கு நாம் வரும்போது நேரம் 12.30. துருக்கிக்கு கொழும்பிலிருந்தே நேரடி விமானங்கள் பயணிப்பதில்லையாதலால் துபாய், கட்டார் அம்மான் போன்ற ஏதாவது ஒரு விமானநிலையத்தினூடான இணைப்பு விமானங்களிலேயே பயணிக்க முடியும். நாம் துபாய் ஊடகவே எமிரேட்ஸ் விமானமொன்றில் பயணிக்க இருந்தோம். சுங்க சோதனை பகுதியில் சந்திந்த டோகா செல்லும் ஒரு நண்பரும் டுபாய் வரையான பயணத்தில் எம்முடனேயே இருந்தார்.

1 மணியளவில் சுங்க சோதனைகளை முடித்துவிட்டதால் 3 மணிக்கு விமானமேறும் வரை விமான நிலையத்தில் இலவசமாக கிடைத்த இணைய வசதியை பயன்படுத்தி Facebook, Twitter என அனைத்து தளங்களிலும் எமது இருப்பை பதிவு செய்து கொண்டோம். இரவு 2 மணி ஆகா லேசாக பசியெடுக்க ஆரம்பித்திருந்தது. விமானநிலையத்திலிருந்த ஒரு உணவகத்தில் (குறைந்த விலைக்கு) கிடைத்த வெஜிடபிள் பர்கரை வாங்கி எமது அரைப்பசியை முழுமையாக தீர்த்துக்கொண்டோம்.

தொடரந்த எங்கள் ஒரு வார பயண அனுபவத்தை இந்த வீடியோ தொகுப்பில் காணலாம்.
http://www.youtube.com/p/7BCE0062491DC90E?hl=en_GB&fs=1

பிரிவுகள்
பயணம்

துருக்கித் தொப்பி யாருக்கு…?

மேலதிக விபரங்கள்: இங்கே

Tags: ICAMES 2009, Turkey, Competition, Project, Selection

பிரிவுகள்
பயணம்

ராஜராஜீஸ்வரம்

(மின்னஞ்சல் வாயிலாக கிடைக்கப்பெற்ற இந்த கட்டுரை அனுமதி இன்றி இங்கு வெளியிடப்படுகிறது. இதன் மூல எழுத்தாளரின் பெயர் தெரியாமையால் இங்கு குறிப்பிடப்படவில்லை)

ராஜராஜீஸ்வரம் - Periya Kovil

தஞ்சாவூர் தமிழ் நாட்டு மாவட்டங்களில் ஒன்று. சென்னையிலிருந்து 334 கிலோமீட்டர் தெற்கே இருக்கும் இந்த மருத நில பரப்பு காவேரி ஆற்றினால் பண்படுத்தப்பட்டுத் தமிழ் நாட்டின் தானியக் களஞ்சியம் என்னும் சிறப்பினைப் பெறுகிறது. இந்த மாவட்டத்தின் தலைநகரும் தஞ்சாவூர்தான். இங்குதான் ராஜராஜன் என்ற மாமன்னன் எழுப்பிய உலகப்பாரம்பரியச் சொத்து என்று ஐக்கிய நாட்டு சபையினரால் (UNESCO) போற்றிப் பாதுகாக்கப்படும் “ராஜராஜீஸ்வரம்” என்ற கோவில் விண்ணோக்கி எழும்பி வெகு தூரத்திலேயே தெரியும் வண்ணம் நிற்கிறது.

சூரிய குலத்தவர் என்று தங்களை அழைத்துக் கொண்ட சோழர்கள் சங்க காலத்திலேயே (கி.மு. 2ம் நூற்றாண்டு தொடக்கம் கி.பி. 2ம் நூற்றாண்டு வரை) வாழ்ந்திருந்தாலும் அந்தக் காலக்கட்டதின் முடிவில் தென்னாட்டு வரலாற்றிலிருந்தே காணாமல் போய்விட்டிருக்கிறார்கள். ஆயினும் சங்கம் வளர்த்த இந்த இனத்தவர் குறுநில மன்னர்களாக உறையூர், பழையாறை போன்ற பழைய தலைநகரங்களிலே தொடர்ந்து வாழ்ந்தனர் என்பதற்குச் சான்றுகள் உள்ளன.

பல்லவர்களின் ஆட்சியின்போது முத்தரையர் என்ற சிற்றரசர்கள் நியமம் என்ற ஊரை தலைநகராகக் கொண்டு காவேரிப்படுகை ஊர்களை ஆண்டிருக்கிறார்கள். இவர்களில் கோ இளங்கோ என்ற புகழ் பெற்ற முத்தரையரை விஜயாலய சோழன் வென்று கி.பி. 850ல் தஞ்சாவூரில் தம் தலைநகரை நிறுவினார்.

விஜயாலயனின் வழையில் வந்த நான்காம் தலைமுறையைச் சேர்ந்த சுந்தர சோழ பராந்தகனுக்கு மூன்று மக்கள். மூத்த ஆண்மகன் கொலை செய்யப்பட்டார். அடுத்தவர் குந்தவை என்ற பெண் மகவு. இளையவர் அருள்மொழி. இவரே ராஜராஜன் என்ற பெயரில் வீறுகொண்டு எழுந்து, உலகம் சந்தித்த சிறந்த அரசர்களில் ஒருவராக நின்றார். தமிழர் என்ற இனத்தார் தனி நாகரிகர்களாக தென்னாட்டில் வாழ்ந்து கொண்டிருக்கிரார்கள் என்பதை உலகுக்கு அடையாளம் காட்டியவரும் இவரே. கடல் கடந்தும் தன் அதிகாரத்தை நிலை நாட்டிப் பல அன்னிய நாடுகளோடு உடன்படிக்கைகள் செய்து கொண்டவர். வெல்ல முடியாத படைபலம் கொண்டிருந்தவர்.

பராந்தகன் 973ம் ஆண்டு அகால மரணம் அடைந்தபோது அவருடைய மனைவியும் உடன்கட்டை ஏறி இறந்து போனார். அப்போது இளைஞராக இருந்த இளவரசர் அருமொழி செய்வதறியாத ஒரு நிலையில் இருந்தார். ஆயினும் விவேகம் நிறைந்த ராஜ தந்திரியாக இருந்ததால் தனக்கு உரிய சிம்மாசனத்தைப் பெறுவதற்கு 18 ஆண்டுகள் பொறுமையாகக் காத்திருந்தார். அதற்கு முன்னரே தன்னுடைய உரிமையை நிலை நாட்ட முயன்றிருந்தால் ஏற்கனவே பிளவுபட்ட நாடு மேலும் சிதறியிருக்கும். அதோடு அவருடைய உயிருக்கும் கூட குந்தகம் விளைந்திருக்கலாம். ஆயினும் அவர் அரியணை ஏறியதும் செய்த முதல் வேலை தன் அண்ணனின் கொலைக்குக் காரணமானவர்களை முறைப்படி தண்டித்ததே.

ராஜராஜன் ஆட்சிப்பொறுப்பை ஏற்றபோது சோழ நாடு ஒரு சிறிய மண்டலமாக மட்டுமே இருந்தது. எனவே தன் நாட்டை விரிவுபடுத்தும் முயற்சிகளைக் கொஞ்சம் கொஞ்சமாக மேற்கொண்டு முதல் கட்டமாக தென்னாட்டை ஒன்றிணைக்க எண்ணினார். அதன்படி பாண்டியன் அமரபுரஜங்கன் என்பானோடு போரிட்டு அவனை வீழ்த்தினார். பின் ரவிவர்மன் என்ற சேர மன்னனையும் “முரட்டொழில் சிங்கள ஈழமண்டலமும்” வென்று வடபுலம் நோக்கித் தன் கவனத்தைச் செலுத்தினார்.

அதற்கு முன் தான் கைபற்றிய நாடுகளில் எல்லாம் அரசு இயந்திரங்கள் சரிவர இயங்க ஆளுநர்களையும் ஏனைய அலுவலர்களையும் நியமித்தார். அதேவேளை ஒவ்வொரு நாட்டிலும் அமைதி காக்கும் படை ஒன்றையும் விட்டுச் சென்றார். ஈழத்தில் அவர் விட்டு வைத்திருந்த வேளைக்காரர் படையின் (COMMANDOS) எண்ணிக்கை 90,000 என்று தெரிகிறது. அப்போது ஈழத்தில் ஆளுநராக இருந்த ராஜராஜனின் மகன் முதலாம் ராஜேந்திரன், தனது 25ம் வயது முதலே தன் தந்தையின் ஒரு படைத்தளபதியாக பணியாற்றி வந்திருக்கிறார். ஈழத்தில் (பொலன்னறுவையில்) இரண்டு சிவன் கோவில்கள் கட்டியவர் இவரே. தனது அன்னையின் பெயரால் வானவன் மகாதேவி ஈஸ்வரம் என்ற அவரால் பெயரிடப்பட்ட ஒரு கோவில் இப்போது சிவன் கோவில் என்றழைக்கப்படுகிறது.

அதன்பின் ராஜராஜன் வென்ற வடபுல நாடுகளைத் திருவாலங்காடு செப்பேடு பட்டியலிட்டு “கங்கை, கலிங்கம், வேங்கி, மகதம், அரட்டம், ஒட்டம், சௌராஸ்டிரம், சாளுக்கியம் ஆகியவற்றை வென்ற பின் அவர்களின் மரியாதையை ஏற்று எழு ஞாயிறு போல உலகை ஆண்டான்” என்று கூறுகிறது.

இப்படி ஒரு மாபெரும் சோழப்பேரரசை நிறுவ அவர் மேற்கொண்ட போர்களில் எல்லாம் அவர் பயன்படுத்திய சேனைகளின் எண்ணிக்கை பதினொரு லட்சத்திற்கும் மேலென்று கணக்கிட்டிருக்கிறார்கள். 31 படை பிரிவுகள் கொண்ட இத்தகைய அளவிலான சேனையைப் பராமரிப்பதற்கும், நிருவகித்து பயன்படுத்துவதற்கும் அசாத்திய திறமையும் நிருவாகத்திட்டமிடல் அறிவும் இருந்திருக்க வேண்டும்.
ராஜராஜப் பேரரசர் தீவிர பக்திமானாக மாறுமுன்னர் அவர் மாலைத் தீவுகளையும் லட்சத்தீவுகளையும் சார்ந்த 12,000 தீவுகளை (”முன்னீர்ப்பழந்தீவு பன்னீராயிரமும்”) கைபற்றியதுவே அவருடைய கடைசிப் போர் நடவடிக்கை ஆகும்.

கோவில்கள்.

இவருடைய ஆட்சியின்போது பல கோவில்களைக் கட்டுவித்தார். சிவன், விஷ்ணு, புத்தர், சமணர் என்று வெவ்வேறு வழிபாடுகளுக்காக இவரும் இவரது குடும்பத்தவர்களும் ஒப்பிலா ராஜராஜேஸ்வரம் உட்பட 52 கோவில்களை எழுப்பி உள்ளனர். இது உலக அளவில் ஒரு சாதனை ஆகும்.

இவருடைய தமக்கை குந்தவை நாச்சியார் ஒரே மாதிரியான மூன்று கோவில்களை (சிவன், விஷ்ணு, ஜெயின்) கட்டினார். ராஜராஜனின் மகன் ராஜேந்திரன் இலங்கையில் கட்டிய கோவில்களோடு கங்கை கொண்ட சோழபுரத்தில் ஒரு சிவன் கோவிலைத் தஞ்சை கோவிலின் மாதிரியிலேயே ஆனால் சற்று சிறிய வடிவத்தில் எழுப்பியுள்ளார்.

ராஜராஜன் ஒரு சிறந்த மாமன்னர். அவரிடம் எல்லா குண நலன்களும் பக்தி, வீரம், தாராளகுணம், நன்றியுணர்வு, இனிமை, பிறரை மதித்தல், ஆழ்ந்த அறிவு, தூய்மை, சலனமடையாதிருத்தல், கண்ணியம், இரக்கம், கொள்கையில் உறுதி, விடாமுயற்சி, குடிமக்களின் நலனில் அக்கறை இத்தனையும் நிறைந்திருந்தன. ஆயினும் கடல் கடந்த நாடுகளில் அவருடைய வெற்றியோ, செங்கோல் வளையாத ஆட்சியோ, போர்த்திறனோ, அவருடைய நினைவுகளை நிரந்தரமாக்கிடவில்லை. மாறாக அவர் கட்டிய இந்த அற்புத சிவன் கோவிலே அவருடைய ஆட்சியின் மேன்மைக்கோர் நினைவுச் சின்னமாக அமைந்தது. அவருடைய காலமே தமிழ் நாட்டு வரலாறின் ஒரு மகோன்னத காலமாக இருந்ததை இக்கோவில் காட்டுவதாகவும் அமைந்து இது தொடர்பாக உலக வரலாற்றில் அவருடைய பெயர் பொன்னெழுத்துக்களால் பொறிக்கப்படவும் வைத்துவிட்டது.

ராஜராஜீஸ்வரம்

சிவபெருமானுக்காக அர்ப்பணம் செய்யப்பட்ட இந்தக் கோவிலை ராஜராஜன் “ராஜராஜீஸ்வரம்” என்றும் அதில் உறையும் இறைவனை ராஜராஜீஸ்வரம் உடையார் என்றும் பெயரிட்டு வழிபட்டார். ” நாம் எடுப்பிச்ச திருக்கற்றளீ ராஜராஜீஸ்வரம் ” என்கிறது அப்பேரரசன் தன்னுடைய கோவிலில் வெட்டுவித்த முதல் கல்வெட்டு. பிற்காலத்தில் வந்தவர்கள் இந்த இறைவனை பிருகத் ஈஸ்வர் என்று அழைக்கத் தொடங்கினர்.
காலத்தை வென்ற இக்கோவில் முழுவதும் கல்லால் ஆனது. இது ராஜராஜனின் 19 வது ஆட்சி ஆண்டில் கட்டத் தொடங்கி அவரது 25வது ஆட்சி ஆண்டு கட்டி முடிக்கப்பட்டு அந்த ஆண்டின் 275 வது நாள் குடமுழுக்கு செய்யப்பட்டது.

கோவில் வளாகம் 3,20,000 சதுர அடி பரப்பில் விரிந்திருக்கிறது. 216 அடி உயரத்தில், இந்திய தீப கற்பத்திலேயே மிக உயரமான ஒரு விமானம், ஓர் அர்த்த மண்டபம், ஒரு மகா மண்டபம், ஒரு முக மண்டபம் இவை அனித்தும் ஒரே கட்டடமாக அமைக்கபப்ட்டிருக்கின்றன. எதிரே ஒரு நந்தி மண்டபமும், வளாகத்தில் அம்மன், சுப்பிரமணியர், சண்டேசுவரர், பிள்ளையார் ஆகியோர் சந்நிதிகளும் இருக்கின்றன. சுற்றிலும் ஒரு திருச்சுற்று மாளிகை காணப்படுகிறது. கோவிலின் தரை மட்டத்திலிருந்து உயர்த்தப்பட்டு தூண்கள் தாங்கும் கூரை கொண்ட தாழ்வாரம் இத்திருச்சுற்றுமாளிகை. இதைத் தொடர்ந்து ஒரு உட்சுவரும் அரணாக புறச்சுவரும் அமைக்கப்பட்டிருகின்றன. கிழக்குப் பகுதியில் இரண்டு பெரிய கோபுரங்கள் நிற்கின்றன.

கோவில் கிழக்கு நோக்கி இருக்கிறது. கோவிலில் நுழையும் முன் கோவிலைச் சுற்றியிருக்கும் அகன்ற அகழி கண்ணில் படும். அகழி சேதமடைந்து வருகிறது. ஆங்காங்கே சிறிது நீரும் தேங்கி நிற்கிறது. கோவில் முன்னால் அகழியை மண்ணிட்டு நிரப்பிக் கோவில் வளாகத்தின் தரை உயரத்திற்கு பாதை அமைக்கப்பட்டிருக்கிறது. இதைக் கடந்ததும் கோவிலை அரணிட்டிருக்கும் கோட்டைச்சுவர் எதிர்ப்படும். சுவர் அகழியை ஒட்டியவாறு செல்கிறது. நுழைவாயிலைக் கடந்ததும் இன்னும் பெரியதொரு சுவர் கோவிலைச் சூழ்ந்திருப்பதைக் காணலாம். இந்தச் சுவரின் வாயிலின் மீது முதல் கோபுரம் எழும்பியிருக்கிறது. இந்த கோபுரத்திற்கு “கேரளாந்தகன் திருவாயில்” என்று பெயர். கேரளாந்தகன் என்பது ராஜராஜனின் பெயர்களில் ஒன்று. இதைக் கடந்து 300 அடி சென்றதும் கோவிலின் உள்கோபுரம் வரும். இதற்கு “ராஜராஜன் திருவாயில்” என்று பெயர். இந்தக் கோபுரத்தின் தாங்குதளத்தில் புராண கால நிகழ்ச்சிகளும் இலக்கிய நிகழ்ச்சிகளும் சிற்பங்களாக வடிக்கப்பட்டிருக்கின்றன.

ராஜராஜன் திருவாயில் வழியாக கோவிலுக்குள் நுழைந்ததுமே நந்தி மண்டபம் எதிர்ப்படும். மேற்கு நோக்கியவாறு இருக்கும் இந்த மாபெரும் நந்தி 11 அடி உயரத்தில் படுத்த நிலையில் இருக்கிறது. இது பிற்காலத்தில் நாயக்கர்களால் நிலை நிறுத்தப்பட்ட உருவம். ராஜராஜன் அமைத்திருந்த நந்தி கோவிலின் தெற்குத் திருச்சுற்றுமாளிகையில் வைக்கப்பட்டிருக்கிறது.

நந்தி மண்டபத்தைக் கடந்ததும் கோவிலின் முக மண்டபம் வரும். நடுவிலும், இரு புறமும் இருக்கும் படிகள் வழியே மேலே ஏறிச் சென்று மண்டபத்தை அடைய வேண்டும். சிற்பங்கள் செதுக்கப்பட்ட கல் தூண்களின் வரிசையைக் கடந்ததும் முன்மண்டபத்தை ஒட்டியபடி மகாமண்டபம் இருக்கிறது. வாயிலின் இரு புறமும் இரு மாபெரும் காவலர்கள் (துவாரபாலகர்கள்) நிற்பதைக் காணலாம். ராஜராஜன் பாணியில் அமைக்கப்பட்ட இந்த காவலர்களின் 18 உருவங்கள் கோவிலின் பிற்பகுதிகளிலும் நிறுத்தப்பட்டிருகின்றன.

உள்ளே நுழைந்ததும் பிரமாண்டமான தூண்களை வரிசை வரிசையாகக் காணலாம். அவற்றின் மீது மிகப் பெரிய குறுக்கு கற்களை வைத்து கூரை அமைத்திருக்கிறார்கள். வெளியே எவ்வளவுதான் வெய்யிலின் கொடுமை தெரிந்தாலும் உள்ளே ஒரு குளிர்ச்சி நிலவுவதை உணரலாம். மகாமண்டபத்தின் இருபுறமும் உலோகச் சிலைகள் வைக்கப்பட்டிருகின்றன.
மகாமண்டபத்திற்கும் கருவறைக்கும் இடையே இருப்பது அர்த்த மண்டபம். இது திருமஞ்சன அறையாகவும் அந்த நாட்களில் பயன்பட்டிருக்க வேண்டும். அர்த்த மண்டபத்தின் வடக்கு, தெற்குப் புறங்களில் இருக்கும் வாயில்கள் வழியாகவும் உள்ளே வரலாம். கோவிலின் தாங்குதளம் மிக உயரமாக இருப்பதால் அர்த்த மண்டபமும் கருவறையும் தரைமட்டத்திற்கு 20 அடி உயரத்தில் இருக்கின்றன. எனவே தெற்கு, வடக்கு வாயில்களைச் சென்றடைய இரு நிலைகளில் உள்ள படிகளில் ஏறிச்செல்ல வேண்டும். படிகளின் பிடிச்சுவர்களில் சிற்பங்கள் செதுக்கப்பட்டிருகின்றன. இரு வாயில்களிலும் காவலர் சிலைகள் காணப்படுகின்றன.

தெற்குப்புறம் இருக்கும் வாயின் மேல் “விக்கிரம சோழன் திருவாசல்” என்ற பெயர் பொறிக்கப்பட்டிருக்கிறது. இந்த எழுத்துக்களை மறைத்துக் கொண்டு இப்போது ஒரு மின் விளக்கு அமைக்கப்பட்டிருக்கிறது. வடக்குப்புறம் இருக்கும் வாயில் அரசனின் மாளிகைக்கு அருகே இருந்ததால் அணுக்கன் திருவாயில் என்று அழைக்கப்பட்டது.
கோவிலின் முக்கிய பகுதி, முழுக்கோவிலுமே ஒரு தனித்தன்மையையும் ஒரு வடிவத்தையும் பெறும் பகுதி, கோவிலின் விமானமதான்.

இது தரை மட்டத்திலிருந்து 216 அடி உயரத்தில் நெடிதோங்கி நிற்கிறது. இரண்டு அடுக்குகளைக்கொண்ட கருவறை, அடிப்பாகத்தில் 98 அடி அகலம் கொண்ட சதுர அமைப்பு. அடுக்குகள் இடயே கொடுங்கைகள் துருத்திக் கொண்டிருக்கின்றன. முதல் நிலையில் தேவகோட்ட மாடங்களில் சிவபெருமானின் 28 முழு உருவச்சிலைகள் வைக்கபாடிருக்கின்றன. இவை சிவனின் பலவித தோற்றங்கள். இரண்டாவது நிலையில், முதலாவது நிலையிலிருக்கும் சிலைகளுக்கு நேர் மேலே திரிபுராந்தகராகத் தோன்றும் சிவனின் சிலைகள் வெவ்வேறு பாவங்களில் நிற்கின்றன.

இந்த அடிப்பாகத்தின் மேல் 13 நிலைகளில் விமானம் இன்னும் மேலே எழுந்து கூராக நிற்கிறது. தமிழரின் கட்டடக்கலையின் தன்மையின்படி ஒரு கோவில் சாதாரண மக்களின் குடியிருப்புகளைவிட வேறுபட்டதாக இருந்துவிட்டால் மட்டும் போதாது. அது அந்த சுற்றுச் சூழலைவிட மிக உயர்ந்து நிற்க வேண்டும் என்ற நியதிக்கோர் எடுத்துக்காடாக விமானம் கம்பீரமாக நிற்கிறது.

உச்சியில் இருக்கும் தளம் 25 அடி சதுரமானது. சிகரம் கூம்பு வடிவில் செதுக்கபப்ட்டு நுனியில் 12 1/2 உயரமான கலசத்தைத் தாங்குகிறது. ராஜராஜனின் 25 ம் ஆட்சி ஆண்டின் 275ம் நாள் கோவிலுக்கு அளிக்கப்பட்ட இக்கலசம் அக்காலத்தில் தங்கத்தால் கவசமிடப்பட்டிருந்தது. இப்போது இல்லை. இதன் பிரமரந்திரத்தளக்கல் ஒரே பாறையால் ஆனது என்றும், 80 டன் எடையுள்ளது என்றும் எல்லாரும் பேசியும் எழுதியும் வருகிறார்கள். ஆனால் திருச்சிராப்பள்ளி நகரிலிருக்கும் டாக்டர் மா. இராசமாணிக்கணார் வரலாற்று ஆய்வு மையத்தின் இயக்குநர், வரலாற்று ஆய்வு மேதை டாக்டர் இரா. கலைக்கோவன் அவர்கள் தமது ஆய்வர்களோடும் இந்தியத் தொல்லியல் அளவீட்டுத்துறையின் அலுவலர்களின் துணையுடனும் விமானத்தின் உச்சிவரை ஏறி இது ஒரே பாறையால் ஆனது அல்ல, பல கற்களை இணைத்து ஒரே பாறை போன்று தோற்றும் வண்ணம் மிக நேர்த்தியாக இணைக்கப்பட்டிருக்கிறது என்றும் கண்டறிந்திருக்கிறார். இந்தக் கல்லின் நான்கு முனைகளிலும் நந்தியின் உருவங்கள் நிறுத்தப்பட்டிருக்கின்றன.

விமானத்தின் 13 நிலைகளிலும் சிற்பங்கள் அழகுறச் செதுக்கப்பட்டிருக்கின்றன. இது கங்கை கொண்ட சோழபுரம் கோவில் போன்று உள் வாங்காமல் ஒரே நேர்ச்சரிவில் அமைந்திருக்கிறது. இது அந்தக் கால கட்டத்தில் தங்களிடமிருந்த சாதனங்களைக் கொண்டு தமிழர்களால் உருவாக்கப்பட்ட மிகச்சிறந்த பொறியியல் சாதனை. பிற்காலத்தில் வந்த அரசுகளின் தீய எண்ணங்களுக்கும், ஆங்கில பிரஞ்சு ஆதிக்கத்தின் போது கோவிலின் வளாகம் வேறு தவறான பயன்களுக்கு உட்பட்டிருந்தபோதும், எல்லாவற்றிற்கும் ஈடு கொடுத்து அழிவிலிருந்து தன்னைக் காத்துக்கொண்டு அது நிமிர்ந்து நிற்பது தமிழ் நாட்டுக் கலைஞர்களின் திறமைக்கு ஒரு சான்றாக இருக்கிறது. இத்தகைய சாதனை செய்து, இத்தனைப் பொருட்செலவில் ஒரு பொறியியல் சாதனை படைக்கத் துணிந்த இந்த விந்தை மன்னனின் இறையுணர்வும், கலையுணர்வும் போற்றுதற்குரியவை.
கருவறை அழகாகச் செதுக்கப்பட்ட துணைப் பீடத்தின் மீதும் தாங்குதளத்தின் மீதும் நிற்கிறது. கருவறையின் உள்ளே 11 அடி உயரத்தில் அழகிய லிங்க வடிவில் சிவபெருமான் தரிசனம் தருகிறார். மிகப்பிரமாண்டமான உருவம் இது.

கருவறையின் உட்சுவருக்கும் புறச்சுவருக்குமிடையே மூன்று புறமும் ஒரு தாழ்வாரம் இருக்கிறது. இவற்றில் உள்ள சுவர்களில் சோழர், நாயக்கர் காலத்து ஓவியங்கள் எழுதப்பட்டிருக்கின்றன. உண்மையில் சோழர் காலத்து ஓவியங்கள் மீது பிற்காலத்தில் வந்த நாயக்கர்களால் ஓவியங்கள் தீட்டப்பட்டு முன்னையது மறைக்கப்பட்டிருக்கிறது. நாயக்கர் கால ஓவியங்கள் சில இடங்களில் உதிர்ந்து போக பழைய மூல ஓவியங்கள் காட்சி தந்திருக்கின்றன. இந்த மூல ஓவியங்களைக் கண்டுபிடித்தவர் திரு ச.க. கோவிந்தசாமிப்பிள்ளை என்பவர். இந்தத் தாழ்வாரத்திற்கு மேலே உள்ள பகுதியில் நாட்டிய கரணங்களைக் கல்லில் வடித்திருக்கிறார்கள். 108 கரணங்களில் 81 மாத்திரமே செதுக்கப்பட்டு, எஞ்சியவை செதுக்க இடம் ஒதுக்கப்பட்டுக் காணப்படுகிறது.
விமானத்தின் ஒரு தளத்தின் மூலையில் தொப்பி அணிந்த ஆங்கிலேயரின் முகம் வடிக்கப்பட்டிருக்கிறது. இவர் யார் என்பதற்குப் பலவிதமான கருத்துக்கள் சொல்லபப்டுகின்றன.

ராஜராஜீஸ்வரத்தின் சிறப்புகள்

ராஜராஜீஸ்வரம் பல வழிகளில் தனித்தன்மை வாய்ந்தது. மிகவும் சிறப்பாகத் திட்டமிடப்பட்டு நேர்த்தியாகக் கட்டப்பட்டிருக்கிறது. வெகு தூரத்திற்கு அப்பாலிருந்து மிகவும் தரமான கற்களையே தேடிக்கொண்டு வந்து அவற்றைப் பொறுத்தி அழகுறச் செதுக்கியிருக்கிறார்கள். அதன் உறுதி வாய்ந்த கட்டட அமைப்பு ஒரு நிரந்தரத் தன்மையை தோற்றுவிக்கிறது.

இக்கோவிலின் சமகாலத்திலும் அதன் பிறகும் எத்தனையோ கோவில்கள் எழுந்தன. ஆயினும் எந்தக் கோவிலையும் தஞ்சை ராஜராஜீஸ்வரம் கோவிலோடு ஒப்பீடு செய்ய இயலாத அளவுக்கு இத்திருக்கோவில் எழுந்து நிற்கிறது. இக்கொவில் போன்று உலகின் வேறு எந்தக் கோவிலுமோ, வரலாற்றுச் சின்னமோ தன்னுடைய வரலாறு பற்றிய விளக்கமான சாசனங்களைத் தன்னகத்தே கொண்டிருக்கவில்லை. இந்தக் கோவிலின் தாங்குதளக்கற்களிலும், குமுதவரிகளிலும், வேறு பகுதிகளிலும் இருக்கும் கல்வெட்டுகள் இக்கோவில் நிர்மாணிக்கப்பட்ட கதையையும் அது நிறுவப்பட்டபோது இருந்த மகோன்னத நாட்களின் சமுதாய அமைப்புகள் பற்றிய விரிவான விளக்கங்களையும் சொல்கின்றன. மேலும் கோவிலுக்கு அளிக்கப்பட்ட அறக்கட்டளைகளின் பட்டியல்கள், வழிபாடு செவ்வனே நடைபெற செய்யப்பட்டிருந்த ஏற்பாடுகள், கோவிலுக்கு அளிக்கப்பட்ட உலோகத்தாலான சிலைகள், சிலைகளுக்கு உரிய தங்கம் வெள்ளியிலானா அணிகலன்கள், கோவிலின் அதிகாரிகள், அலுவலர்கள், ஏனைய பணியில் இருப்போரின் பெயர்கள், முகவரிகள், சம்பளங்கள் (400 தளிப்பெண்டிர் உட்பட) முழுவதுமே சிறிய சிறிய விவரங்களைக்கூட விட்டுவிடாமல் துல்லியமாக எழுதப்பட்டிருக்கிறது.

இவற்றுள் ஒரே வரிசையில் வரும் 107 பகுதிகள் உள்ள கல்வெட்டு மிகவும் முக்கியமானது. இது ராஜராஜனின் 25 ஆவது ஆட்சி ஆண்டின் 275 ஆவது நாள் தொடங்கி 29 ஆவது ஆண்டு வரையிலான அவரது கொடைகள் மற்றும் அவரது குடும்பத்தவரும் அரசு அதிகாரிகளும் அளித்த கொடைகள் பற்றி விரிவாக குறிப்பிடப்படுகிறது.

கலை வளர்த்த கோவில்

அக்காலத்தில் சிற்பியரே கட்ட்டக்கலை நிபுணர்களாகவும் வண்ணம் பூசுவோராகவும் பணி புரிந்தனர். தஞ்சைக் கோவிலில், அதைக் கட்டிய இந்த விற்பன்னர்களின் இந்த மூன்று கலைகளும் மிக நேர்த்தியாக இணைந்திருப்பதைக் காண முடியும். சோழர்களுக்குக் கோவில் கட்டுவது என்பது தங்களின் கலை உள்ளத்தின் ஒரு வெளிப்பாடு மட்டுமன்றி அது ஒரு வாழ்க்கை முறையாகவும் இருந்திருக்கிறது. இதனால் அக்கால சமுதாய வாழ்க்கை கோவிலையே சார்ந்து சுழன்றிருக்கிறது. நாட்டிஅய்ம், நாடகம், இசை ஆகியவையும் கோவிலில்மரங்கேறி, கவின் கலைகள் ( FINE ARTS) வளர்க்கபப்ட்ட ஒரு மையமாகவும் கோவில் செயல்பட்டிருக்கிறது. சோழரின் 450 ஆண்டுகால புக்ழபெற்ற வாழ்வு விஜயாலய சோழனின் காலத்தில் தொடங்கியது. ஆயினும் அவர்தம் மகோன்னத காலம் ராஜராஜன் என்ற அந்தப் பெரும் ஆற்றல் அரியணை ஏறியபோதுதான் தொடங்கியது. அந்த ஆற்றல் ஏற்படுத்திய அலையில் சில நூற்றாண்டுகள் பயணம் செய்து, விஜயாலய சோழனின் நேர்வழி வாரிசுகள் 1279ல் அழிந்து போனதோடு சோழரின் இனம் யாருமே நன்றி நினைக்காத ஒரு நிலையில் புவியின் பரப்பிலிருந்தே மரைந்து போனது.

ஆயினும் ராஜராஜன் என்ற ஒப்பில்லா மறத்தமிழனின் புகழ் ராஜராஜீஸ்வரம் என்ற அவர் கல்லில் எழுதிய காவியம் இருக்கும்வரை நிலைத்திருக்கும். உலகமும் அவரைக் கைகூப்பித் தொழும்.